孩忙期的la-ji-ooh｜停落來講五四三

便若到年底欲寫「年度回顧文」的時，攏會去掀這冬所寫過的文章，嘛會共舊年寫的年底招呼文閣讀一擺，看這冬有啥物無仝抑是進展。今年和舊年的中心思想猶原共款，重心原在囥佇厝內，甚至是開愈濟的時間拍拚阮理想的生活。

今年阮規家伙仔的生活有足大的變動，為著保護厝內的人佮好好仔用心感受生活，愛過一暫仔才會分享這部分的代誌。

雖罔今年攏無寫公開的文章（是我經營網站以來頭一擺發生），不而過陪伴囡仔的生活中定定予阮思考足濟往過無想過的問題，已經養成逐工記錄反思的習慣。只是這个時陣我的人生有閣較重要的任務在身，整理文章就等後擺緣份到矣順勢才來做就好。

最近共「今天，就過喜歡的日子」這本冊看了矣，佮阮兜這馬的生活理念足峇；若是佇五冬前，這本冊我一定看袂落去。時機到矣，宇宙就攏安排好勢，毋管是生活抑是想法。

這幾冬劉慧君老師的想法予我真濟支持，今年嘛共「光是『勇敢停下來』，或是離開不適合的環境，也是一大成就。」這句話送予逐家。

內容真豐沛的台文曆日，「好額毋值著會食，好命毋值著勇健。」咻應著離開無適合的環境，身體嘛會較勇健。

尾手，今年猶原揣時間練習囡仔點名欲食的糕仔餅佮麭，分享予逐家用目睭食。

向望逐个人攏袂予人攪吵，佇家己星球的軌道順勢發揮，咱逐工攏愛好好仔生活好好仔喘氣喔！

今年問好的時間真正無濟，簡單仔共逐家相借問一咧，我閣欲繼續轉來佮囡仔講彼看起來敢若無意義閣敢若有意義的五四三。因為，彼攏是未來囡仔成長的養分，嘛是咱大人閣會當重新活一擺的機會。

延伸閱讀：在孩子的成長過程中，需要這樣一個 #準備好要回應他們的大人。

歷史上的今天，我寫了...

• 孩忙期的la-ji-ooh｜年終浮出來換個氣打聲招呼 - 2022
• 練習簡單生活的2017年 - 2017
• 豐收的2016年，因為有妳／你 - 2016
• 充實的2015年，謝謝有妳／你 - 2015
• 2014跪婦阿冠在做什麼？--年終在忙啥篇 - 2014
• 生日紀念–2008，阿冠生日快樂！ - 2008